குடியரசு தலைவர் தேர்தல் நாளை நடக்கிறது. இந்த தேர்தலில் எம்பி, எம்எல்ஏக்கள் மட்டுமே வாக்களிக்க முடியும். எம்பிக்கள் நாடாளுமன்ற வளாகத்திலும், எம்எல்ஏக்கள் அந்தந்த மாநில தலைமை செயலகத்திலும் வாக்களிக்க தேர்தல் ஆணையம் ஏற்பாடுகள் செய்து வருகிறது. தமிழக எம்எல்ஏக்கள் அனைவரும் சென்னை தலைமை செயலகத்தில்தான் வாக்களிக்க உள்ளனர். அவர்கள் வாக்களிக்க வசதியாக தலைமை செயலகத்தில் உள்ள சட்டசபை குழு அறை வாக்குச்சாவடி மையமாக மாற்றப்பட்டுள்ளது. வாக்குச்சீட்டு கள் ஆங்கிலத்திலும், தமிழிலும் அச்சடிக்கப்பட்டு சென்னையில் தயார் நிலையில் உள்ளது. வாக்குப்பெட்டி கடந்த 15ம் தேதி டெல்லியில் இருந்து சென்னைக்கு வந்து, பாதுகாப்பாக வைக்கப்பட்டுள்ளது. சென்னை தலைமை செயலகத்தில் வாக்குப்பதிவு நாளை காலை 10 மணிக்கு தொடங்கி மாலை 5 மணி வரை நடைபெறும்.
முதல்வர் ஜெயலலிதா, திமுக தலைவர் கருணாநிதி, மு.க.ஸ்டாலின் மற்றும் எம்எல்ஏக்களும் நாளை சென்னையில் வாக்களிக்க உள்ளனர். அதிமுக எம்பிக்கள் 14 பேரும் சென்னையிலேயே வாக்களிக்க அனுமதி வாங்கி உள்ளதால், அவர்களும் நாளை சென்னையில் வாக்களிப்பார்கள். தேமுதிக புறக்கணிக்கும் என்று அறிவித்திருந்தது. ஆனால் அந்த முடிவை மறுபரிசீலனை செய்ய வேண்டும் என்று காங்கிரஸ் வேண்டுகோள் விடுத்திருந்தது. இதனால் தேமுதிக எம்எல்ஏக்கள் வாக்களிப்பார்களா என்ற பரபரப்பு ஏற்பட்டுள்ளது. நாளை நடைபெறும் குடியரசு தலைவர் தேர்தலையொட்டி தலைமை செயலகத்தில் பாதுகாப்பு அதிகரிக்கப்பட்டுள்ளது. வாக்குப்பதிவு அனைத்தும் வீடியோவில் பதிவு செய்யப்படும் என்று மாநில தலைமை தேர்தல் அதிகாரி பிரவீன்குமார் கூறினார்.
வாக்குப்பதிவு முடிந்ததும் தேர்தல் அதிகாரிகள் முன்னிலையில் சீல் வைக்கப்படும். பின்னர் 20ம் தேதி, தேர்தல் அதிகாரி ஒருவர் வாக்குப்பெட்டியை டெல்லிக்கு எடுத்துச் செல்வார். விமானத்தில் வாக்குப்பெட்டி தனி இருக்கையில் வைத்து கொண்டு செல்லப்பட உள்ளது.
