இதுகுறித்து அவர் இன்று செய்தியாளர்களுக்கு அளித்த பேட்டி:
கேள்வி : தி.மு. கழகம் நடத்தும் இன்றைய அறப் போராட்டத்திற்கு தமிழகம் முழுவதும் மிகப் பெரிய வெற்றி கிடைத்திருப்பதைப் பற்றி உங்கள் கருத்து என்ன?
கருணாநிதி : உண்மையைச் சொன்னதற்காக நன்றி.
கேள்வி : தமிழக அரசின் காவல் துறையினர், போராட்டத்தில் ஈடுபட வந்திருப்பவர்களையெல்லாம் பயமுறுத்துவதைப் போலப் பேசுகிறார்களே?
கருணாநிதி : எதிர்பார்த்தது தான்!
கேள்வி : எழுச்சி எவ்வாறு உள்ளது?
கருணாநிதி : எதிர்பார்க்காத அளவிற்கு உள்ளது. மிகப் பிரமாண்டமான அளவிற்கு போராட்டத்தில் கலந்து கொண்டுள்ளார்கள்.
கேள்வி : அடுத்த கட்டப் போராட்டம் என்ன?
கருணாநிதி : இந்தக் கட்டம் முதலில் முடியட்டும்.
கேள்வி : அ.தி.மு.க. ஆட்சியினர் இந்தப் போராட்டத்திற்குப் பிறகு திருந்தி விடுவார்கள் என்று எதிர்பார்க்கிறீர்களா?
கருணாநிதி : திருந்துவார்கள் என்று நம்பவில்லை. ஏனென்றால் அண்ணா அவர்களின் பெயரால் உள்ள நூலகம் உலகத் தரத்தோடு கட்டப்பட்டது. அறிஞர்களாலும், சான்றோர்களாலும் வியந்து பாராட்டப்பட்டது. அந்த நூலகத்தை இழிவுபடுத்த வேண்டும், ஆபாசப்படுத்த வேண்டுமென்பதற்காகவே திருமணங்களுக்கு வாடகைக்கு விடுகிறார்கள். எனவே இந்த ஆட்சியினர் திருந்துவார்கள் என்று நாங்கள் எதிர்பார்க்கவில்லை.
