திருவள்ளூர் மாவட்டம், ஊத்துக்கோட்டை போலீஸ் உட்பிரிவில் ஊத்துக்கோட்டை, வெங்கல், ஆரணி, பெரியபாளையம், பென்னலூர்பேட்டை ஆகிய போலீஸ் நிலையங்கள் உள்ளன. இதில் தமிழக - ஆந்திர எல்லையோரம் அமைந்துள்ளது பென்னலூர்பேட்டை போலீஸ் நிலையம். இங்கு ஏழு சிறப்பு எஸ்.ஐ.,க்கள் மற்றும், 11 போலீசார் பணியில் உள்ளனர்.இந்த போலீஸ் நிலையத்தின் கட்டுப்பாட்டில், 77 கிராமங்கள் உள்ளன. தமிழக - ஆந்திர எல்லையில் இந்த போலீஸ் நிலையம் அமைந்துள்ளதால், தமிழகத்தில் இருந்து திருட்டு மணல், ரேஷன் அரிசி மற்றும் ஆந்திர மாநிலத்தில் இருந்து மலிவுவிலை மது, செம்மரக்கட்டை ஆகியவை கடத்தப்படுவது தொடர்கதையாக உள்ளது.
கட்டிப்புரண்டு சண்டை
இதில் இங்கு பணியாற்றும் போலீசாரை சம்பந்தப்பட்டவர்கள் "கவனிப்பதால்' கடத்தல் சம்பவங்களில் ஈடுபடுபவர்கள் பயமின்றி செயல்படுகின்றனர். இதில் நேற்று முன்தினம் இரவு போலீஸ் நிலையத்தில் போலீஸ் தலைமைக் காவலர் வாசு மற்றும் போலீஸ் பாபு இருவருக்கும் இடையே பணத்தை பங்கு பிரிப்பதில் மோதல் ஏற்பட்டுள்ளது.வாய்த்தகராறு உச்சத்தை அடைந்தது. உடனிருந்த போலீசார் எவ்வளவோ சொல்லியும் கேட்காமல் இருவரும் போலீஸ் நிலையத்திலேயே கட்டிப்புரண்டு சண்டை போட்டனர். இதுகுறித்து தகவலறிந்த மாவட்ட எஸ்.பி.,ரூபேஷ்குமார்மீனா, சம்பந்தப்பட்ட வாசு, பாபு ஆகிய இரு போலீசாரையும் ஆயுதப்படைக்கு மாற்றம் செய்ய உத்தரவிட்டார்.போலீஸ் நிலையத்திலேயே போலீசார் கட்டிப் புரண்டு சண்டை போட்ட சம்பவம் அப்பகுதி மக்களிடையே பரபரப்பை ஏற்படுத்தியுள்ளது.
நன்றி: தினமலர்
